Nga: Ben Andoni

Ka gati një muaj që kanë mbaruar zgjedhjet në Kosovë, por nuk reshtin ankesat dhe akuzat e formacioneve të ndryshme ndaj njëra-tjetrës. Grupe të tëra degësh shpërngulen nga një parti në tjetrën, ndërsa kryetarët dhe anëtarët vazhdojnë të akuzojnë njëri-tjetrin për legjitimitetin e zgjedhjeve. MAPO ka zhvilluar dy intervista me dy protagonistë të këtyre zgjedhjeve, ku ndërsa për zëvendëskryeministri Hajredin Kuqi, gjërat janë brenda kontrollit dhe formacioni i PDK-së tregoi se kush është sërish me fitoren e tij, për drejtuesin e “Vetëvendosjes”, z.Albin Kurti ose të themi formacionit që i surprizoi të gjithë, gjërat janë krejt ndryshe. Ky i fundit vazhdon të jetë kundër bisedimeve me serbët dhe me një gjuhë dhe aksion të përbashkët me Shqipërinë. Në pamje të parë, jo vetëm nuk mund të flitet, por edhe nuk mund të besohet për koalicion të “Vetëvendosjes” me PDK-në, vetëm se ndërsa z. Kuqi thotë se partia e tij është e hapur me të gjithë formacionet, nga ana tjetër Albin Kurti mohon se formacioni i tij mund që të bashkëpunojë me partitë, që kanë vepruar keq në zgjedhje. Dallimet janë kudo dhe madje ato shtrihen deri te raporti i Dick Marty-t, ku zëvendësministri Kuqi pretendon se ne jemi të hapur për bashkëpunim dhe se këtë e kanë treguar vazhdimisht; kurse zoti Kurti pretendon se Zoti Thaçi i ka interesuar në një farë mënyre ky raport, sepse Shtëpia e Verdhë jo vetëm nuk ka ekzistuar, por përmendja e emrit të Thaçit pranë saj do të thotë që ai të dalë i pafajshëm. Ai e bën përgjegjës këtë të fundit indirekt për përmendjen e emrit të tij në trafiqe dhe më shumë akoma e stigmatizon, se ai po fshihet pas emrit dhe luftës së UÇK-së, duke e përdorur. Për publikun shqiptar, që hera-herës ngatërrohet madje edhe në emrat e formacioneve të ndryshme që janë në Kosovë, dy intervistat janë një mundësi e mirë për të parë zhvillimet e një politike që i ngjan shumë shtetit Amë. Kjo e fundit si koncept pranohet vetëm nga Albin Kurti, ndërsa për Zotin Kuqi s’ka shtet Amë, por vëlla ose motër.

Kuqi: Njerëzit
tanë shembull
bashkëpunimi
Zëvendëskryeministri i Kosovës, Hajredin Kuqi, flet për zgjedhjet e fundit në Kosovë, marrëdhëniet me Serbinë dhe koalicionet e mundshme. Përdor një gjuhë të kujdesshme për Shqipërinë e madhe, ashtu si edhe për korrupsionin dhe fenomenet e tjera me të cilat është përball Partia e tij. Tek të gjitha, PDK-ja, është faktori kryesor i Kosovës, paçka se njerëzit e saj në muaj e fundit kanë qenë pjesë e hetimeve të organeve kompetente

Kosova pas zgjedhjeve të fundit duket sikur është në një udhëkryq. Ndërkohë formacioni juaj politik PDK është listuar i pari. Sipas jush, pse e votojnë sërish kosovarët, PDK-në?
“Partia Demokratike e Kosovës në tre vitet që kaluan ka treguan aftësinë e saj qeverisëse dhe gatishmërinë për të marrë vendime të mëdha për vendin dhe për të bërë politika zhvillimore. Dhe nëse marrin fotografinë e Kosovës, në kuptimin figurativ, të vitit 2007 dhe 2010, Kosova është krejt ndryshe: Ajo ka infrastrukturë më të mirë, përveç se është shtet dhe ka krijuar një angazhim për cilindo qytetar që të ndihet më mirë. Momentalisht, PDK-ja është alternative më e mirë për qytetarët e Kosovës”.
Ka pasur, duke iu referuar pretendimeve të formacioneve të ndryshme, parregullsi të mëdha. Pse ka një tendencë që Kosova të marrë gjërat më të këqija të zhvillimeve politike të Shqipërisë?
“Dua të them se zgjedhjet, më shumë ose më pak kanë një traditë të mirë në Kosovë. Kemi dy qasje: të parën, që zgjedhjet lanë për t’u dëshiruar dhe kanë nevojë për përmirësime adekuate dhe, e dyta, e një logjike që është refuzuese tek ata që rezultatet e tyre kanë qenë dëshpëruese. Besoj se PDK-ja, i takon pjesës së parë që zgjedhjet duhet të përmirësohen dhe se ishin të lira, fair dhe demokratike dhe me mundësi të jenë më të mira, por të mos harrojmë diçka që zgjedhjet në Kosovë janë nën një lupë shumë të madhe ndërkombëtare, shumë më tepër se në vendet e tjera të Rajonit. Jam i bindur se në këtë drejtim janë vërejtur dobësi. Ne kemi shprehur dëshirën për t’u përmirësuar dhe kemi respektuar vendimet e komisioneve qendrore zgjedhore, të paneleve të ankesave, të gjykatave supreme dhe tani kemi përmirësime të dukshme. Jam i bindur se këto zgjedhje kanë plotësuar standarde të domosdoshme për të ndërtuar institucione legjitime dhe demokratike. Natyrisht, në kohën e zgjedhjeve, adrenalina është pak më e lartë dhe njerëzit ata që humbin i shikojnë parregullsitë më shumë, kurse ata që fitojnë shikojnë më shumë përparësitë. Unë vetë i shikoj aty në mes”.
Deri tani ka qasje të ndryshme mediatike, përsa iu përket koalicioneve që do të drejtohen nga Ju. Shumë parti, që ju kanë atakuar më parë, tani duan të afrohen. Si një nga njerëzit kryesorë të formacionit tuaj PDK, a keni ndonjë plan për mënyrën sesi do e ndërtoni koalicionin tuaj?
“Partia Demokratike e Kosovës është parti e hapur për të gjithë spektrin politik në vendin tonë. Neve nuk e shohim logjikën tonë bardhë e zi, por shikojmë mundësi bashkëpunimi dhe politika zhvillimore. Ende nuk kemi marrë qëndrim për ofertën politike që do të bëjmë me formacionet e tjera, por kemi pikat tona të referencës. Pas përfundimit dhe certifikimit të mandatit, dy gjëra do t’i sigurojmë. Që brenda afatit dy javor pas certifikimit të mandateve, do të bëjmë qeverinë e re, presidentin, dhe kuvendin e ri të konstituar, e dyta qeveria do jetë stabile, e qëndrueshme do të kthehet në qeveri për ta”.
Cilat janë dikasteret që do donit të mbani ju pa asnjë mëdyshje? Dhe, nëse do të duhet të lini postin e kryeministrit për hir të ndonjë koalicioni, a do ta bëni?
“Jo. Nuk ka asnjë logjikë në këtë drejtim. Partia Demokratike e Kosovës i ka numrat e mjaftueshëm ta themelojë që sot qeverinë, por duam një qëndrueshmëri për legjitimitetin më të madh politik se për ndryshe pika e stabilitetit të vendimmarrjes të institucioneve është PDK-ja dhe tani mbetet vetëm çështje kohe dhe në mungesë të numrave. Më lejoni të them që ka qenë si modë këtu që kundër PDK-së paraqiteshin vizime me elektorat për zhvillim, por që s’ka qenë efektive”.
Pse ju ngacmojnë gjithnjë te Kryeministri Juve?
“Ata e dinë se kryeministri ynë, Thaçi, është njeriu më i fuqishëm në Kosovë dhe dukshëm më i forti se të tjerët. Dhe, në Ballkan, është një prirje që s’ka parti të fortë me lider të dobët dhe logjika është që të jetë konkurrent me lider. Liderat e partive të tjera mund të jenë konkurrentë për vendin e dytë dhe të tretë, por momentalisht e kanë të pamundur për vendin e parë. Dhe pika e referencës është qëllimi për të goditur”.
Është një slogan i kohëve të fundit në Kosovë që lidhet me “duart e pastra”. Ndërkohë, që formacioni juaj është prekur sidomos muajt e fundit me një fushatë ndaj ministrave dhe PDK. Mendoni se kjo do ta kushtëzojë disi qeverinë?
“Partia Demokratike ka shprehur gjithnjë gatishmërinë e saj të dukshme për vlerat euroatlantike dhe bashkëpunimin me drejtësinë. Njerëzit tanë janë shembull në gatishmërinë për bashkëpunimin me të, por secili është i pafajshëm derisa gjykata të japë një vendim tjetër dhe mbi këtë bazë duhet të funksionojë. PDK-ja është partia më e fortë, më proeuropiane dhe adresë e sigurt e faktorëve ndërkombëtarë të BE-së dhe SHBA-së për Kosovën dhe për këtë s’kemi fare dilema...”.
Çuditërisht, në intervistën e kësaj jave, zoti Dick Marty ishte shumë i kursyer me zotin Thaçi, për të mos thënë se e ndryshoi disi sulmin e raportit. A mendoni se është i keqkuptuar disi raporti në tërësi?
“Unë them që akuzat e tilla kanë qasje politike dhe juridike. Qasja politike është se lufta jonë lidhet me UÇK-në dhe komandantin tonë, ndërsa përsa i përket çështjes juridike ajo lidhet me opsionin e Tribunalit të Hagës dhe EULEX-in. Vetë kryeministri ka kërkuar hetime dhe sa më shpejt të dalë e vërteta aq më mirë do të jetë. Kjo, vetëm për të mirën demokratike. Kosovën dhe kryeministrin Thaçi nuk e frikëson e vërteta”.
I ka kapacitetet e duhura Kosova që të menaxhohet për hetime të thella?
“Të keni parasysh diçka: Kosova është një nga vendet që ka pasur menaxhimin e plotë nga faktori ndërkombëtar përsa i përket drejtësisë, Tribunali i Hagës dhe të tjera. Sot që nga viti 2008, çështjet që kanë të bëjnë me krimet e luftës, kanë lidhje me EULEX-in. Këto kanë fuqitë e tyre. Problemet e tilla politike zgjidhen vetëm me rrugën juridike dhe unë mendoj që e vërteta do jetë përgjigja më e mirë”.
Cilat do jenë sfidat e ardhshme të PDK-së. Njësoj si qeveria shqiptare juve jeni në një presion të madh për korrupsion. Do keni një target të caktuar ku do punoni?
“Ne kemi marrë dhe më parë hapa të domosdoshëm në këtë drejtim. Kemi ndërtuar një infrastrukturë ligjore dhe kemi forcuar institucionet dhe përveç kemi ndërtuar edhe ekstra institucione si task forcë për korrupsionin etj., dhe bashkëpunojmë më mirë me ndërkombëtarët, me EULEX-in. Për herë të parë në mandatin tonë është bërë luftë me korrupsionin. Jo se më parë s’ka pasur, por zhvillimi ekonomik i ka bërë këto”.
Mendoni se do ketë probleme për Ju, nëse do lini jashtë qeverisë zotin Limaj dhe të tjerë, të cilët janë në hetim?
“Do bisedojmë për këtë në Partinë Demokratike, por për ne secili është i pafajshëm, nëse gjykata vërteton të kundërtën. Në politikë mund të punohet dhe luftohet me perceptime, por në drejtësi duhen vetëm fakte”.
Besoj se keni ndjekur së fundi çështjen e zotit Meta, që ka treguar përveç fenomenit të korrupsionit edhe një aleancë të brishtë qeverisëse. Ju si e keni parë nga jashtë Tiranës aktin e korrupsionit?
“Ne i përcjellim zhvillimet në Shqipëri me kujdes të lartë. Në kuptimin pozitiv apo negativ, ato kanë një reflektim të lartë në botën shqiptare por se kemi logjikën e partenalitetit. Ne nuk e konsiderojmë që jemi kujdestarë ashtu si edhe nuk e pranojmë. Ne e konsiderojmë Shqipërinë si vend motër apo vëlla, por jo babë apo nanë. Ky është mendimi im, dhe kjo ndodh pas vitit 2008. Pas pavarësimit të vendit tonë, ne respektojmë qëndrimin e Shqipërisë dhe unë besoj se edhe në Shqipëri po forcohet rendi dhe ligji dhe strukturat që tregojnë përqasjen e Shqipërisë euroatlantike. Dua t’ju them se çdo gjë e mirë e Shqipërisë është një kënaqësi dhe respekt i veçantë për ne dhe e kundërta”.
Çfarë po bëni në lidhje me bisedimet me Serbinë? A keni njerëz të specializuar për këtë? Keni ndonjë platformë apo prisni që serbët të luajnë të parët?
“Kosova është e përgatitur për pozicionin e saj. Ne kemi theksuar temat që mund të diskutohen dhe ato s’kanë të bëjnë me statusin, tërësinë territoriale, rendin juridik kushtetues, sovranitetin e plotë dhe afatin kohor. Ne duam të kemi afat fillimi dhe afat mbarimi me qëllimin e arritjes së një marrëveshje historike shqiptaro-serbe. Këto, jo thjesht për rregullimin thjesht të dy tre çështjeve dhe pastaj mbylljes. Dhe, po ashtu, është me interes dhe duam jo vetëm përballjen por edhe prezencën e BE-së dhe SHBA-së. Ne kemi ekspertizën tonë dhe e them pa modesti se që nga viti 1999 në çdo bisedim e drejta ka qenë nga ana jonë dhe njerëzit e kanë më të lehtë të mbrojnë të drejtën se të kundërtën. Jam i bindur se pas kësaj, Kosova do dalë me një qartësi për të, por edhe me një rregullim të marrëdhënieve të mëtejshme për raportin shqiptaro-serb, që do ndikojnë, jo vetëm në integrimet rajonale, por dhe ato të përbashkëta në BE”.
Si e shikoni të ardhmen e Kosovës për integrimin dhe vizat?
“Kjo çështja e vizave, e cila po ngadalësohet po ndodh prej pak vendeve evropiane që s’e kanë njohur ende vendin tonë, megjithëse Kosova e ka marrë një vizë për integrimet evropiane. Kjo po ngadalëson dinamikën, por ne do të punojmë njëanshëm të plotësojmë kushtet dhe të marrim udhërrëfyesin. Dhe, më 2012, Kosova jo vetëm do të liberalizojë vizat, por edhe në proceset integruese, Kosova do të afrohet me vendet e tjera të rajonit, si një pjesë e gjithë e Ballkanit Perëndimor”.
A do ketë një të ardhme të përbashkët Shqipëri-Kosovë. A e shikon Z. Kuqi, një Shqipëri të madhe në të ardhmen?
“Dua të them dy qëndrimet: zyrtare dhe personale. Qëndrimi zyrtar është të jemi bashkë në Bruksel dhe nuk mendojnë të mos ketë zgjidhje që ka s’ka kohezion nacional dhe partneritet ndërkombëtar. Mendimi personal për mua është më problem atje ku janë shqiptarët dhe sllavët, si po ndodh në Preshevë dhe në Mal e Zi, apo Maqedoni. Për sa i përket Kosovës, ajo është shtet dhe mund ta lëvizim si të duam por problemi shqiptar nuk është më Kosova ajo s’është problem më i pa zgjidhur. Zgjidhja e problemit shqiptar s’duhet parë pjesë-pjesë, por si tërësi”.
Albini: Kosova dhe Shqipëria janë një

Për drejtuesin e ‘Vetëvendosjes’ s’ka ekuivoke: Mes Shqipërisë dhe Kosovës s’duhet të ketë dogana dhe as kufij. Ato duhet të jenë me Serbinë. Në këtë intervistë ai flet për pretendimet e vjedhjeve të zgjedhjeve në Kosovë, për ‘Vetëvendosjen’ dhe si do jetë formacioni i tij tashmë në Parlament...

Ka një reagim të gjithë faktorit në Shqipëri që duket më shumë si luftë brezash prej ngritjes suaj. Ju përkrahin të rinjtë, ndërsa janë më të tërhequr politikanët dhe madje shprehin edhe rezerva. Pse ndodh kështu?
“Mendoj se është mirë për Kosovën dhe gjithë shqiptarët që Lëvizja ’Vetëvendosja’ po forcohet. Në programin tonë të fuqishëm tashmë po ia bashkëngjisim një organizate të fuqishme. Jemi shumë optimistë që ngritja jonë do jetë e vazhdueshme përgjatë këtij viti dhe në përgjithësi në vijim. Shqiptarët s’duhet të krahasohen më të kaluarën e hidhur dhe të ndjehen mirë me të tashmen. Shqiptarët duhet ti kenë të qartë gjërat e tyre dhe ata karshi tyre se çfarë realiteti po jetojmë. Ne, në Kosovë, jetojmë që atë ta bëjmë shtet normal demokratik, i cili nuk mund të krahasohet vetëm me periudhën e okupimit të Serbisë dhe të thuhet se gjendja është e mirë, por të krahasohemi me vendet e përparuara europiano-perëndimore dhe më tej. Besoj se në përgjithësi, pritet mirë ‘Vetëvendosja’, ngaqë ajo ka koncept të drejtë; bën punë të palodhshme dhe gjithmonë në çdo vend vë interesin e përgjithshëm mbi atë vetjak”.
Cilët ishin votuesit tuaj më së shumti?
“Mendojmë që votuesit e ‘Vetëvendosjes’ kanë qenë njerëzit, të cilët ishin të pakënaqur në Kosovë dhe që janë të vetëdijshëm se faktori vendor mund të bëjë ndryshimet në vend. Neve nuk na kanë votuar njerëzit, sepse u kemi dhënë favore individualisht apo se janë frikësuar prej nesh. Na kanë votuar ata që kanë menduar se duke u bërë mirë për ta do të jetë mirë për të gjithë ata, të cilët janë të guximshëm dhe në dëshirën e tyre për ndryshime. Ne nuk konsiderojmë se pjesëmarrja në parlamentin e ardhshëm të Kosovës paraqet ndonjë transformim; kjo ngaqë neve nuk po bëjmë zëvendësim mënyrash të veprimit por shtim të tyre. Deri më tani kemi qenë opozitë jashtë parlamentit, tashti do jemi jo vetëm aty, por dhe brenda parlamentit”.
Ju e dini shumë mirë se ka pasur disa koalicione për krijimin e qeverive kosovare dhe disi gati të pabesueshme. LDK-ja, AAK-ja dhe PDK-ja kanë luftuar shumë kundër njëra-tjetrës, por edhe e kanë gjetur gjuhën mes tyre, kur ka ardhur pjata e pushtetit. Çfarë do të ndodhë me “Vetëvendosjen” po iu afrua një pjatë e tillë?
“Ne nuk hymë në koalicion me këto parti politike, të cilat i quajmë shkaktare të gjendjes së rëndë në Kosovë. Ne nuk u bashkohemi atyre dhe as marrim pjesë në qeveri teknike se përzierja me ta është ndotje për ne. Ne nuk mendojmë që një veprim i tillë do të ishte i drejtë, pasi do ishte i dëmshëm për Kosovën. Ne do të jemi një opozitë në rrugën për plotësimin e objektivit të saj që ka dy drejtime të rëndësishme:

i pari ndërprerja e negociatave me Serbinë që na afrohen si sëmundje kronike dhe ndërprerja e këtij privatizimi neoliberal, i cili e la Kosovën pa ekonomi dhe sferë publike”.
Zgjedhjet e fundit kanë treguar parregullsi të shumta në Kosovë, që e afruan shumë si fenomen me Shqipërinë. Kush është e përbashkëta e Homos Albanicus, po ta përkufizonim kështu qenien shqiptare? Si e shikon z. Kurti si drejtues i “Vetëvendosjes”?
“Mendoj që në Kosovë pushteti ishte shumë i dhunshëm në zgjedhjet e12 dhjetorit dhe me këtë rast u vodhën votat e qytetarëve të saj. Kjo ndodh ngaqë ky pushtet s’ka siguri në vetvete dhe mendoj se mungesa e sigurisë dhe vetëbesimit në vete ka bërë që pushteti të mbërthehet nga paniku dhe të vjedhë kaq shumë dhe të jetë i dhunshëm. Nuk mendoj se votat që janë vjedhur tregon se është kopjuar diçka nga Shqipëria apo nga vendet e tjera. Mendoj se rrethanat, në të cilat vepron ky pushtet, që e ka uzurpuar shtetin, janë rrethana që po bëhen gjithnjë e më të paqëndrueshme, meqenëse dhe vullneti dhe interesi s’është për këtë. Kështu, më 12 dhjetor ka qenë vjedhja më e madhe e zgjedhjeve të pasluftës, por edhe denoncimi më i madh i Kosovës së pasluftës, pasi shumica e ankesave në PZAK dhe më pas kur i jemi i drejtuar dhe gjykatës supreme është bërë nga vetë ‘Vetëvendosja’”.
I kthehemi problemit social. Kosova po varfërohet dhe duket se populli është pasiv dhe e pranon. A e pranoni këtë konstatim se ai është më i dhënë më shumë pas të drejtave politike sesa ato ekonomike e sociale, nëpërkëmbet, por s’do t’ia dijë?
“Ekonomia në Kosovë matet nëpërmjet përqindjesh njëshifrore të rritjes ekonomike, e cila tek qytetarët dhe shoqëria ka efekt vetëm psikologjik. Ne duam të rikonceptojmë ekonominë në drejtim të ekonomisë politike, me ç’rast që rritja ekonomike do matej me përkthimin e saj në mirëqenie sociale. Njëkohësisht duam, që zhvillimi ekonomik duhet të jetë i shprehur në prodhim. Kosova dhjetëfish më shumë importon sesa eksporton. Paratë nga reminitancat e emigrantëve ne i nxjerrim shumë shpejt jashtë vendit nëpërmjet këtij deficitit të madh tregtar që është etabluar. Mendoj se ka qenë thjesht shtypja dhe represioni gjatë okupimit të Serbisë, që të vihet theksi më shumë tek të drejtat politike dhe qytetare sesa te ato ekonomike dhe sociale. Po ajo që u krye gjatë luftës dhe mbijetesa ishte luks dhe ne vazhdojmë të kemi një mendësi kolektive ku shpëtimi dhe jo fitorja është fjala kryesore e qytetarëve. Por, pas intervenimit të NATO-s dhe luftës që u zhvillua në Kosovë më pranverën e vitit 1999, e ku intervenimi i NATO-s përjetohej si mrekulli, gati në përmasa fetare, njerëzit, hynë në këtë kurthin e mbijetesës të shpëtimit të atypëratyshëm. Dhe, ndaj, 11 vjet pas lufte s’kemi dalë nga ky, por vërejmë se njerëzit kanë filluar me pa tani kotësinë e të drejtave politike dhe civile në kushtet e stagnimit real ekonomik dhe mjerimit”.
Një çështje e prekshme janë bisedimet e ardhshme me Beogradin. Ju keni bërë vazhdimisht apel për krijimin e zinxhirit të komunave, por edhe punën e nëndheshme të politikës dhe diplomacisë serbe. Si do i qaset Kosova, me gjithë problematikën e saj, Serbisë?
“Nuk duhet të ketë fare bisedime me Serbinë, përderisa ajo nuk e pranon pavarësinë e Kosovës; nuk e ndryshon kushtetutën e saj ku shkruan se Kosova është pjesë e Serbisë; nuk i krijon falje popullit shqiptar për krimet e bëra; dhe nuk na i kthen trupat e të pagjeturve; nuk na dorëzon kriminelët e luftës; nuk na paguan dëmet; nuk e ndërpret diskriminimin në Luginën e Preshevës; dhe nuk pushon së financiari strukturat paralele të saj në Kosovë. Gjithashtu, Serbia duhet të kthejë librat kadastrialë, fondet pensionale dhe depozitat bankare të qytetarëve të kosovës. Dikush mund të flasë me fqinjin për çështje të interesit të përgjithshëm, por jo për oborrin dhe kuzhinën e shtëpisë së tij. Me një fqinj si Serbia është absurde të bisedohet për shtëpinë tonë Kosovën. Këto bisedime të paralajmëruara i nevojiten Serbisë që dëshiron të integrohet në Bashkimin Evropian pa njohur pavarësinë e Kosovës; të rrugëtojë në integrimet evropiane pa njohur Kosovën; dhe ato i nevojiten Brukselit që sa më shumë të shkëpusë Serbinë nga Rusia. Por ne, si Kosovë dhe si shqiptarë, nuk përfitojmë asgjë nga këto biseda. Në vitet e ’90, Serbia e Sllobos e kishte të okupuar dhe e posedonte Kosovën. Pas lufte nuk e posedon Kosovën por do ta kontrollojë atë. Këtë mes dy mekanizmave. Një nga vendi anëtar në forumet ndërkombëtare, ku Kosova s’bën pjesë dhe ajo dëshiron të hyjë para nesh dhe ti bëjë Kosovës ata që Greqia po i bën Maqedonisë. Dhe, mekanizmi i dytë, mes enklavave serbe ku zotërojnë serbët dhe veriu i ndarë që ajo do ti konsolidojë si Republika Serbe ngjashëm si në Bosnjë. Pra, posedimi i Kosovës nga Serbia e Millosheviçit duan kontrollin e Kosovës nga Tadiçi. Qëllimet e tyre ndaj Kosovës s’kanë ndryshuar por mjetet janë të ndryshme. Ne nuk mund ta shohim Serbinë me syrin e Brukselit, Nju Jorkut dhe Uashingtonit. Ndërsa për ata janë të rëndësishme dallimet mes Tadiçit dhe Koshtunicës, për ne shqiptarët dhe kosovarët më e rëndësishmja është e përbashkëta e tyre, që është e madhe”.
Nga raporti i Dick Marty-t, keni qenë disi të tërhequr dhe jo folklorikë si palët e tjera. Si e keni parë atë konkretisht?
“Mendoj se raporti i tij është raporti kundër Kosovës dhe shqiptarëve dhe kundër UÇK-së. Dhe, akuzat e tij, nuk i karakterizojnë faktet dhe argumentet, por hamendësimet dhe qëllimet tendencioze politike. Akuzat s’janë të reja, sepse i kemi dëgjuar dhe më herët. Ajo që është risia është sikleti i kryeministrit dhe i njerëzve të afërt të tij. Kjo ndodh se kryeministrit Thaçi dhe shokëve të afërt të tij u është përmendur emri. Nëse në këtë raport nuk do përmendej emri i tyre, atëherë s’do të ishte kjo piskamë për raportin. Por përmendja e tyre me emër dhe mbiemër, i ka vendosur në siklet. E dyta, Shtëpia e Verdhë s’ekziston dhe janë bërë hetime për këtë. Por ajo që brengos ata, është se janë disa akuza që Dick i përmend në raport dhe jo me Thaçin si pjesëtar në UÇK, por Thaçin me kollare pas lufte. Akuza për trafikimin sex trade, akuza për trafikim droge, armësh dhe cigare e naftë, që përmenden rrëshqitazi në raport, janë aty. Këto e brengosin në të vërtetë atë. Besoj se Thaçi dhe shokët e tij do ishin të interesuar të dilnin në gjyq për Shtëpinë e Verdhë se në mënyrë absolute do të dilnin të pafajshëm, meqenëse nuk ekziston, por kanë hall akuzat e tjera. Dua të tërheq vëmendjen se në spotin promocional Thaçi thoshte tre ëndrra kam pasur: Çlirimin, Pavarësinë dhe Integrimin Evropian. Dy i bëra, një më ka mbetur ëndërr. Unë ju çlirova, unë ju pavarësova dhe unë do t’ju dërgoj në BE. Por, pas raportit, thoshte përmes meje u sulmua UÇK-ja, mes meje u sulmua kombi shqiptar. Para fushatës dilte para UÇK-së dhe privatizonte historinë; pas raportit të Dick Marty-t vjen pas. Në stilin e dhelprës, në përrallat tona, që i është djegur bishti dhe thoshte se është kall e gjithë dynjaja. Por këtu është me rëndësi të theksohet se ish-kryeministri duhet ta vendosë ose me Thaçin ose me Dick Marty-n. Ne se pranojmë këtë shantazh të dyfishtë. Për ne, UÇK-ja është UÇK-ja e Adem Jasharit me flamurin e kuq me shkabën dy krenare dhe jo UÇK-ja e Thaçit me flamurin me lara. Është UÇK-ja me himnin rreth flamurit të përbashkuar dhe jo e UÇK-ja e Thaçit me himnin pa tekst. Këtë ne duam ta bëjmë”.
Cila do të jetë lufta juaj në Parlamentin e ardhshëm të Kosovës dhe lufta ballë këtij realiteti?
“Lufta jonë në parlament do të jetë parimore. Në vend të negociatave me Serbinë, ne duam bisedime me Tiranën për t’iu bashkuar Shqipërisë. Në vend të doganave me Shqipërinë ne duam dogana me Serbinë, sepse ky pushtet deri më tash lejoi të digjen pikat doganore me Serbinë dhe mbajti pikat me Shqipërinë. Lëvizja ‘Vetëvendosja’ do të angazhohet dhe brenda institucioneve që t’i heqë doganat me Shqipërinë dhe t’i vendosë me Serbinë. Ne mendojmë që populli shqiptar në Shqipëri dhe Kosovë jemi një, por duhet të bëhemi si jemi dhe, gjithashtu, kemi obligim politik e kombëtar që gjithë shqiptarët në Ballkan t’i ndihmojnë që të kenë të drejtat e tyre, sepse janë popull autokton që po shtypet. Tirana e Prishtina duhet t’i harmonizojnë hapat strategjikë që një ditë të kemi një shtet të fuqishëm në Ballkan, se kemi nevojë për një shtet të ri dhe jo shtetin e ri të Kosovës, që të krijojë një komb të ri. Është vullneti dhe interesi ynë të bashkohemi dhe nga ana tjetër duam që në Kosovë të ketë zhvillim ekonomik dhe që rrugës së kombit t’i shoqërohen dy gjëra: kontrollin e kufijve shtetërorë dhe fabrikat e kombit...”.
Si të është dukur si përfaqësues i “Vetëvendosjes”, lajmet dhe evidencat për korrupsionin e fundit në Shqipëri që ka marrë përmasa ndërkombëtare?
“Korrupsioni është një dukuri e përhapur gjithandej, por mendoj që nuk mund të konsiderojmë se vjen vetëm nga pandershmëria e politikanëve të caktuar. Ai ka shkaqe strukturore, për të cilat ka folur gjerë e gjatë... Blendi Kajsiu”.
Si e shikon “Vetëvendosjen” në fund të këtij mandati?
“Mendoj se do kemi një rritje të vazhdueshme si lëvizje. Deri më tani janë rreth 20.000, ndërsa deri më tashmë që s’dihet ende jemi në nivelin e 13-16 përfaqësuesve në parlamentin e ardhshëm të Kosovës. Ashtu si aktivisti i Lëvizjes ‘Vetëvendosjes’ s’është qytetar i zakonshëm, ashtu edhe deputeti i Lëvizjes së saj s’është deputet i zakonshëm. Vullneti i popullit duhet të jetë kudo dhe çdo herë dhe jo sikur tani, por kudo dhe brenda parlamentit. Dhe, Lëvizja do jetë opozitë e fuqishme si jashtë, por edhe brenda parlamentit, derisa të bëhet Pozitë. Unë jam optimist”.